Францияда ЖЧ-2022 финалини қайта ўтказиш юзасидан бошланган петицияга дастлабки кунларнинг ўзида 200 мингдан ортиқ киши имзо чекди. Францияликлар ҳал қилувчи ўйиндаги ҳакамликдан норозилар...
Ҳа, Қатар-2022 мундиали финалидан сўнг mesopi-nions.com порталида петиция жараёни бошланди. Ушбу норасмий ҳужжатда жаҳон кубоги тақдирига ойдинлик киритган ўйинни қайта ўтказиш талаб қилинган. Энг эътиборли томони, ушбу кулгули талаб остига аллақачон 208 мингдан кўпроқ киши имзо чекишга улгурди. Эслатиш керак, ЖЧ финалини польшалик Шимон Марчиняк бошқариб борди ва расмий доирада унинг иши яхши баҳоланди. Бироқ францияликлар ҳакам ишига коррупция аралашганини таъкидлашмоқда. «Финалдаги ҳакамлик очиқчасига сотилди. Биринчидан, пенальти йўқ эди, иккинчидан, Аргентина термасининг кейинги голидан олдин Килиан Мбаппега нисбатан қўполлик ишлатилганди», - дея петиция асосини кўрсатди ташаббускор гуруҳ. Бироқ биламизки, ФИФА бу каби петицияларга эътибор қаратмайди.
Ўз навбатида, Аргентинада ҳам французларга жавобан шундай жараён бошланди. Аргентиналиклар ўз петицияларига жарангдор ном танлашди: «Франция, йиғлашни бас қил». Ушбу ҳужжат қисқа вақт ичида 250 мингдан ортиқ имзо тўплади. «ЖЧдаги ғалабамиздан кейин французлар йиғлашдан, нолишдан тўхташмаяпти, Аргентина жаҳон чемпиони эканлигини тан олишмаяпти. Бу петиция французлар йиғлашни бас қилиб, Месси футбол тарихидаги энг зўри, Мбаппе унинг ўғлидек эканлигини тан олишлари учун...», — дейилади ҳаракат баёнотида.
А.АБДУВАЛИХЎЖАЕВ тайёрлади
